LAOAG CITY – Inpasigurado ni Senate Finance Committee Chairman Sherwin Gatchalian nga awan ti nakalibas a korapsion iti babaen ti inaprobaran nga Unprogrammed Appropriations (UA).
Daytoy ket kalpasan nga inaprobaran iti bicameral conference committee ti nayon a P178.1-M iti unprogrammed funds ti 2026 national budget a dumanonen iti P243.4-B.
Dinakamat ni Gatchalian nga inikkaten iti 2026 budget ti Strengthening Assistance for Government Infrastructure and Social Programs (SAGIP) a maysa a lump sum funds para iti government infrastructure ken social services ngem nausar iti maanomalya a flood control projects.
Inpasingkedna nga iti baro nga urnos ti Unprogrammed Appropriations ket awanen ti pagtaudan pay ti korapsion.
Inlawlawag ni Gatchalian a maaddaan latta ti unprogrammed funds inton sumaruno a tawen gapu kadagiti foreign-assisted projects nga agkasapulan ti counterpart funding manipud iti gobierno.
Nainayon pay kadagiti items nga adda iti unprogrammed funds ket ti nayon a panangpundo iti Armed Forces of the Philppines Modernization Program.
