LAOAG CITY – Natay ti maysa a construction worker kalpasan a napaltu-paltogan iti Sitio Sinigpit iti Barangay Caray iti ili ti Nueva Era.
Ti biktima ket agtawen ti 38, naasawaan ken residente iti nasao met laeng a barangay.
Napaltogan ti biktima iti sumagmamano a daras iti paset ti barukong ken ulona.
Narekobre dagiti otoridad ti tallo nga empty shells ti calibre .45.
Naitaray ti biktima iti Rural Health Unit iti ili ti Nueva Era ngem naiyakar daytoy iti Doña Josefa Mariano Marcos Memorial Hospital iti ili ti Marcos no sadinno a ditoy a naideklarar a dead on arrival babaen ti attending physician.
Nakikoordinar ti Nueva Era Municipal Police Station iti Provincial Tactical Operations Center para iti pannakaiwayat ti dragnet operations, nagkiddawda pay iti Scene of the Crime Operation ken manarimaan ti panangkitada no adda dagiti nakaimuntar a Close Circuit Television camera iti nakapasamakan ti insidente.
Iti agdama, agtultuloy a maiwaywayat ti naun-uneg nga imbestigasion.
