LAOAG CITY – Inkalintegan ti United States Department of Homeland Security (DHS) ti panangpaltog ti Immigration and Customs Enforcement (ICE) iti maysa a babai idiay Minneapolis.
Basar iti Department of Homeland Security, dimmipensa laeng ti Immigration and Customs Enforcement officer gapu ta maipagarup a ginandat ti nasao a babai a dungparen isuda.
Gapu iti daytoy, nakapungtot ni Minneapolis Mayor Jacob Frey no sadinno nga inpettengna a rinanta ti Immigration and Customs Enforcement officers a paltogan ti agtawen ti 37 a babai.
Nabuyana ti video nga awan ti pangta iti biag dagiti Immigration and Customs Enforcement officers ken maipagarup a kellaat lattan a pinaltoganda ti biktima.
Inpasiguradona a mangiwayatda ti imbestigasion ken pagsungbaten dagiti nangpaltog nga Immigration and Customs Enforcement officers.
Maipalalagip a nangiwayat ti immigration crackdown dagiti otoridad idiay Minneapolis ken nangi-deploy-da ti sumurok dua a ribu a federal agents.
