LAOAG CITY – Inpadanon ni Mayor James Bryan Alcid ti panagyamanna kadagiti empleado ditoy siudad ti Laoag.
Daytoy ket kalpasan ti napintas a panagtrabaho ken panagkikinnammayet iti tunggal maysa.
Inbatadna a masapul latta a maitultuloy ti napintas a relasionda iti tunggal maysa tapno makaaramidda pay kadagiti naruay a proyekto ken programa.
Kunana nga uray saan nga agpapada ti pammati tunggal maysa ket masapul latta ti saan a panagpipinnerdi ken no adda man ti pagbiddotan no dadduma ket nasayaat no agtitinnulong tapno masolbar dagitoy.
Mainaig iti daytoy, kuna ni Alcid a ti panagtrabaho ket aggapu iti puso tapno ad-adda a makaaramid ti nasayaat a pakabenepisiaran dagiti umili ditoy siudad ti Laoag.
Kabayatanna, inpasingkedna a kadagiti sumarsaruno a bulan ket ad-adu pay dagiti aktibidad ken programa para kadagiti umili gapu ta kayatna a makita a kanayon a naragsak dagiti Laoageño babaen kadagitoy a banag.
