LAOAG CITY – Nagkari ni Senate President Vicente “Tito” Sotto III a dagus nga agtignay no gandaten manen ti kamara de representantes nga i-impeach ni Vice President Sara Duterte.
Segun ken ni Sotto, aniaman nga impeachment case a maipasa iti Senado ket trataren da a dagus.
Iti saludsud no nakasaganan ti senado iti possible a panangusig ken no possible a makaapektar ti kastoy a proseso iti kinatalged ken ekonomiya ti pagilian, insungbat ti Senate President a nasapa pay wenno “premature” tapno maamoan ti pagtungpalan ti impeachment case.
Kabayatanna, immunan nga inrakurak ti Makabayan bloc ken ni Akbayan party-list Rep. Perci Cendaña a nakasagana dan a mangisumitir ti baron nga impeachment case kontra iti Bise Presidente apaman nga agngudo ti one-year bar rule intono Pebrero 6 ita a tawen.
Maipalagip a na-impeach ni Vice President Sara Duterte iti kababaan a pagpandayan linteg iti Kongreso idi Pebrero 5, 2025, ngem pinaawan bileg ti Korte Suprema gapu iti panaglabsing na iti konstitusyon a mangipawil ti panagpila ti nasursurok ngem maysa nga impeachment complaint kontra iti maymaysa nga opisyal iti uneg ti maysa a tawen.
