LAOAG CITY – Nagpalawag ni Atty. Gabriel Villareal, lead counsel ken pannakangiwat ni Charlie “Atong” Ang a temporario a saan daytoy a sumangsango iti media tapno saan a maapektaran dagiti legal nga addang nga ilunglungalong para iti klientena.
Inbatad ni Villareal a mangiparuk-at lattan ti opisinana ti opisial a rakurak no kasapulan tapno mangipaay ti update iti kaso.
Kunana nga ita nga aldaw ket mangisubmitir ti depensa ni Ang ti Omnibus Motion tapno mawaswas ti warrant of arrest nga inparuk-at ti Korte iti Laguna mainaig iti pannakapukaw dagiti mammallot.
Mangnamnama ti kampo ni Ang nga insigida a mangikeddeng ti panagdengngeg ti Korte iti mosyonda inton sumaruno a lawas.
Inpetteng ni Villareal a naganat ti pannakaiparuk-at ti arrest order ken naglabsing daytoy iti karebbengan ti klientena gapu ta kurang ti impormasion nga inpaay ti Department of Justice.
Inlawlawagna a makumikom daytoy iti panagsagsagana ti napapateg a legal a dokumento isut gapuna a saan pay laeng a makasungbat kadagiti saludsod kenkuana.
Nupay kasta, inpasigurado ni Villareal nga ipatpategda ti panangikagumaan a mangngeg ti takder ni Ang ken sitatallugod daytoy kadagiti interview apaman a nasolbaren dagiti kasapulan ti klientena.
