LAOAG CITY – Nangiparuk-at ti Las Piñas Regional Trial Court ti warrant of arrest kontra kadagiti dati a 18 bodyguard ni dati a congressman Zaldy Co, wenno adadda nga amammo kas “maleta boys.”
In-isyu ni Judge Kathryn Sabado ti nasao a warrant daytoy ket mainaig iti uppat (4) a bilang ti pejury a sangsangoen ti tunggal maysa kadakuada.
Agdagup ti ₱18,000 a piansa iti tunggal bilang ti kaso, gapu iti daytoy, umabot daytoy ti ₱72,000 a masapol a bayadan ti tunggal maysa kadakuada para iti temporario a pannakawayawayada.
Maipalagip a nagrugi dagiti kaso kalpasan ti pannakaisilpo dagiti dati a bodyguard kadagiti sumagmamano nga opisial ti gobierno nga adda pakainaginna kadagiti flood control anomaly, no sadinno ket maipagarup nangipatulod dagitoy dagiti maleta a naglaonan dagiti kuarta a kickback.
Kabayatanna, naglikudan dagiti opisial dagiti alegasion bayat ti panagsubbotda ti kontra demanda para kadagiti dati a bodyguard.
Malaksid iti perjury iti Las Piñas, ti grupo kaduada dagiti abogadoda ket sumangsango pay iti innem (6) a bilang ti cyberlibel iti sabali pay a korte iti Metro Manila gapu iti panagiwarasda kadagiti alegasion iti social media ken kadagiti press conference.
