LAOAG CITY – Binabalaw ti Department of Justice (DOJ) ti abugado ti negosiante a ni Charlie “Atong” Ang iti saan nga husto a balakad iti klientena a saan a sumuko kadagiti otoridad iti baet dagiti warrant of arrest mainaig iti kaso dagiti mapukpukaw a mammallot.
Inbatad ni Justice spokesperson Polo Martinez, dagiti rakurak ni Atty. Gabriel Villareal ket adda ti epektona iti panagbalin nga abugado daytoy iti klientena.
Inlawlawagna a mabalin a mapilaan ti baro a kaso ni Atty. Villareal gapu ta ti panaglabsing iti maipatpatungpal a warrants ket addaan ti pannusa iti babaen ti Revised Penal Code.
Kunana nga inkabil ti abugado ti kliente daytoy a ni Ang iti ‘disadvantage position.’
Mainaig iti daytoy, mabalin nga irekomendar iti Korte Suprema nga i-reprimand ni Villareal no ti balakad ket makalapped kadagiti proseso nga ipatpatungpal ti Department of Justice.
Malaksid iti daytoy, posible a mapagsungbat iti babaen ti Code of Professional Responsibility and Accountability ni Villareal a panaglabsing kas maysa nga abugado.
Maipalagip nga inpetteng ni Villareal a saan pay a mabalin nga ibilang a kriminal ni Ang gapu ta saan pay a naipasango iti panangtingiting.
Kinontra pay ni Villareal ti panangideklar a maysa nga “armed and dangerous” ni Ang gapu ta maipagarup nga awan ti pangibasaran, napeggad ken makapadanag.
