LAOAG CITY – Inrakurak ni Philippine National Police (PNP) Spokesperson PBGen. Randulf Tuaño a saan a lappedan ti ahensia dagiti miembro daytoy a kalikagumna nga agtestigo iti International Criminal Court (ICC) mainaig iti war on drugs ni dati a Presidente Rodrigo Duterte.
Daytoy ket kagiddan iti panawagan ti Prosecutor Office ti International Criminal Court dagiti direkta a testigo manipud iti Philippine National Police, Philippine Drug Enforcement Agency (PDEA) ken National Bureau of Investigation (NBI) mainaig kadagiti napasamak idi kampania kontra iti droga.
Inlawlawag ni Tuaño a daytoy ket panawagan laeng ti International Criminal Court a saan ketdi a summon a kidkiddawenda ti boluntario a kooperasion dagiti nasao nga ahensia.
Kunana a no kalikagum ti miembro nga agtestigo ket nasken a personal legal decision daytoy.
Mainaig iti daytoy, bigbigen ken iresrespetar ti Philippine National Police ti due process ken legal a karebbengan dagiti miembro a kalikagum a makikaysa iti nasao a panawagan ti International Criminal Court.
