LAOAG CITY – Bimmassit ti bilang dagiti business owners nga agturturong iti Laoag City Hall tapno agpa-renew ti business permit.
Daytoy ti nagbalin nga obserbasion ni Atty. Charito Malicad, Officer In Charge ti Business Permit and Licensing Office ditoy siudad ti Laoag.
Mamati isuna a daytoy ti resulta ti inpasa ti Sangguniang Panlungsod a pannakaiyalud-od ti deadline ti business renewal.
Inbatadna a mabalin a ginundawayan daytoy dagiti dadduma a business owners tapno itantan met ti panagturongda iti City Hall tapno ag-renew.
Inlawlawagna a sipod nangrugida ket sumurok-kumurang maysa a ribu pay laeng ti naakomodarda iti pakabuklan a sumurok-kumurang innem a ribu a pasdek negosio ditoy siudad ti Laoag.
Kunana a ti panawen a naipaay kadagitoy ket makaanayen tapno maakomodarda amin.
Nupay kasta, inpalagipna kadagiti business owners a saanda a liwayan ti panag-renew gapu ta no malpas ti deadline ket addanton ti multa a maipataw kadakuada.
Maipalagip nga iti kallabes ket nangipasa ti maysa a resolusion ti Sangguniang Panlungsod a mangiyalud-od iti panawen ti panag-renew dagiti business permittees agingga inton Pebrero 28.
