LAOAG CITY – Bwineltaan ni Senador Rodante Marcoleta ni Senate Blue Ribbon Committee Chair Panfilo Lacson kalpasan ti inparuk-at ti minorya ti Senado a ‘Minority Report’.
Daytoy ket kalpasan nga immuna nga inawagan ni Sen. Lacson a maysa a panangbastos iti Blue Ribbon Committee ken iti kangatoan a pagpandayan linteg iti kongreso ti inaramid ti minorya a panangiparuk-at ti nasao a report, aglalo ket saan pay a nakaiparuk-at ti nasao a komite ti bukod a committee report.
Inpetteng pay ni Lacson a ti kapintasan a lugar para iti nasao a report ket maikabil iti pagbasuraan.
Segun met ken ni Sen. Marcoleta, masapol a basaen nga umuna ti Blue Ribbon chair ti linaon ti nasao a report sakbay nga awagan na a basura.
Inkalintegan ti senador a saan a dakes ti inaramid da a panangiparuk-at ti report, aglalo ket saan met a mangiparparuk-at ti nasao a komite ti bukod da a report, idinto a nagkari iti kallabes ti chairman a mangiparuk-at da ti partial report
Sinaludsud ti Senador no kaano a makakita dagiti Pilipino ti aktwal a kopya ti report ti Blue Ribbon Committee, kalpasan ti sumagmamano nga hearing a naisayangkat sipud pay iti napalabas a tawen.
Inlawlawag pay ti senador a ti paangiparuk-at ti minorya ti bukodna a report ket tapno ilungalong iti komite a mangiparuk-at uray laeng partial report kalpasan ti nakaat-atiddog a serye dagiti panagdengngeg.
Sinublianan pay ni Marcoleta ti immuna a tallo a panagdengngeg nga inaramid na iti ababa a panawen idi daytoy ti chairman ti nabileg a komite.
Kuna na a ti linaon ti minority report ket manipod iti tallo a kaunaan nga hearing nga indaulwan na ken iti tallo a simmaruno nga hearing nga indaulwan ni Sen. Lacson kas simmaruno a chairman.
Innayon na a no ibilang ni Sen. Lacson a basura ti nasao a report, arignana ibagbaga ti pada na a senador a basura ti umuna a tallo a panagdengngeg nga indaulwan na.
