LAOAG CITY – Nasugatan dagiti tallo nga indibidual kalpasan a nagbaliktad ti nagluganan da a Pick-up iti paset ti Barangay Lumbad iti ili ti Dingras.
Basar ken ni Barangay Chairwoman Cristine Tadena iti Barangay Lumbad ti nasao nga ili, aggapo da iti barangay hall idi nakangngeg da ti arigna panagbettak rason a nagturong da a dagus iti lugar ket ditoy a nakita da ti nagbaliktad a maysa a Pick-Up.
Naamoan ti kapitan a dagiti biktima ket taga ditoy ciudad ti Laoag ken agturong da koma iti ili ti Solsona idi napasamak ti insidente.
Rumrumuar a nablow-out ti ligay ti Pick-Up isut gapuna a nagbaliktad iti igid ti kalsada a kimmamang iti taltalon.
Nakaruwar met a dagus dagiti biktima a pakairamanan ti dua a lalaki ken maysa a babai manipod iti nagbaliktad a behikulo ken saanda a napakarwan.
Nagkedked metten dagiti biktima a naipan iti ospital gapu ta saan met a nakaro ti sinagaba da a sugat isut gapuna a kalpasan a naipaayan da ti first aide babaen kadagiti nagresponde a kameng ti Rural Health Unit iti ili ti Dingras ket kiniddaw da nga aginana da laeng.
Immabot iti sumagmamano nga oras sakbay a nabangon ti nagbaliktad a Pick-Up.
