LAOAG CITY – Kalikagom ni Senate President Vicente Sotto III nga adalen ti senado ti posibilidad a maideklarar ni Chinese embassy Deputy Spokesperson Guo Wei kas persona non grata (unacceptable, unwelcome person) ditoy Pilipinas kalpasan ti agtultuloy a panangatake na kadagiti Pilipino nga agpanpanday linteg.
Insingasing daytoy ni Sotto kabayatan ti plenary session iti senado, partikular iti committee on rules.
Nupay kasta, inbatad ni Senate President Pro Tempore Panfilo Lacson a ti laeng mangidaulo iti Pilipinas ti mabalin a mangideklarar kas declare persona non grata no ti karaman ket dagiti diplomats.
Gapu iti daytoy, kuna na a ti laeng mabalin nga aramiden t senado ket irekomendar ti nasao nga addang ken ni Presidente Ferdinand Marcos Jr.
Immunan a dinillaw ni Senador Erwin Tulfo ti panangkondenar ti Chinese Embassy kadagiti rakurak ti sumagmamano nga opisyal ti Pilipinas mainaig iti isyu iti West Philippine Sea.
Segun ken ni Tulfo, awan ti karbengan ti Chinese Embassy a mangsita kadagiti opisyal ti pagilian kadagiti rakurak da kontra kadagiti maipagarop a panangtagikua ti China iti teritoryo ti Pilipinas.
Inpetteng na a no saan a maawat dagiti opisyal ti embahada no kasanu a magmagna ti demokrasya iti pagilian, mabalin da ti pumanaw iti aniaman nga oras.
