LAOAG CITY – Inpakaammo ni Mrs. Janet Retamal, mangidadaulo ti Population on Commission ditoy siudad ti Laoag a bumabbaba ti bilang dagiti ubbing nga inna ditoy siudad.
Nupay kasta, inlawlawagna a bumabbaba met ti tawen dagiti agbalbalin a teenage mother ditoy siudad.
Segun ken ni Mrs. Retamal, basar iti kaudian a rekord iti opisinada ket bimmaba ti bilang dagiti teenage mother no idasig kadagiti napalpalabas a tawen ngem umub-ubing met dagiti agsiksikog.
Inbatadna a ti ar-aramiden ti opisinada ket ti intervention wenno iti panagsursor iti kada pagadalan tapno maipaadal kadakuada dagiti rumbeng nga aramiden dagiti agtutubo.
Kunana a babaen iti daytoy ket masursuroda no kasano a protektaran wenno respetaren ti bukudda a bagi ken saan a makinaig a nasapa.
Inpettengna nga agtultuloy ti panangipaayda ti tulong kadagiti teenage mother ditoy siudad tapno adda met ti agserbi kadakuada ken saan a maidadanes no ania ti nagbiddotanda.
Kabayatanna, inallukoyna dagiti nagannak a masapul a tutukan wenno imonitor dagiti annakda tapno saanda a maisagmak wenno maiturong iti dakes a dana.
