LAOAG CITY – Nakaawiden iti pagtaenganda idiay Minneapolis ti ubing nga agtawen ti lima a ni Liam Conejo Ramos ken ti amana a ni Adrian Alexander Conejo Arias kalpasan a naibalud iti Immigration and Customs Enforcement (ICE) idiay Texas, basar ken ni Texas Congressman Joaquin Castro.
Inrakurak ni Castro a winayawayaan ti agama manipud iti Dilley detention center ken nakadanondan idiay Minnesota.
Nadakamat a ti pannakawaya-waya ti agama ket natungpal kalpasan a naikkan ti emergency order ti United States District Judge Fred Biery ti pamilia.
Iti desisionna, binabalaw ni Biery ti pannakaibalud ti nasao nga ubing ken kunana a gapu daytoy iti “perfidious lust for unbridled power” ken nagpanawagan ti naurnos ken makatao a proseso iti immigration.
Depensa ti ng Immigration and Customs Enforcement a saanda a target ti agama no diket nairana laeng nga inbati ti ama ti anak daytoy ngem inpetteng ti abugado ti pamilia a sinurot ti agama ti husto a proseso ti asylum, simrek idiay Estados Unidos idi 2024 iti legal a wagas, nagusar ti CBP One app, nagatendar kadagiti appointment ken dimmatagda iti Customs and Border Protection.
Gapu iti daytoy, maisupadi ti dakdakamaten ti Department of Homeland Security (DHS) nga ilegal a simrek ti agama idiay Estados Unidos.
Iti post ti Immigration and Customs Enforcement iti social media, naglikudanda a naibalud ti ubing.
Inkalintegan ti Department of Homeland Security ken Immigration and Customs Enforcement ti nagbalin nga operasionda ken ibagbagada a naglibas ti ama ni Liam banag a naiget met a naglikudan ti pamilia iti nasao nga alegasion.
Kabayatanna, nag-post iti social media ni Minnesota Congresswoman Ilhan Omar no sadinno a kinablaawanna ti agama.
