LAOAG CITY – Naragsak ni Gov. Cecilia Araneta Marcos a maysa kadagiti nagbalin a kaunaan a naisayangkat nga aktibidad iti anibersario ti Ilocos Norte ti “pasyar.”
Inlawlawagna a nairanta daytoy a para kadagiti agad-adal tapno maiyammo kadakuada dagiti napipintas a lugar ditoy probinsia.
Naikeddeng a nangrugi daytoy ita nga aldaw, Pebrero 4 ken agpatingga inton Pebrero 20.
Inbatad ti gobernador a maysa kadagiti rason a napanunutanda ti nasao a tignay ket tapno nasapa a maipasagepsep kadagiti ubbing ti kinapintas ti Ilocos Norte.
Malaksid iti daytoy, kunana a maysa pay kadagiti gagem ti nasao a tignay ket tapno saan nga agbalin nga estranghero dagiti umili iti bukud a probinsia agsipud ta maobserbaran a naruay a kakailian ti saan a makadandanon kadagiti dadduma a lugar ditoy Ilocos Norte.
Mainaig iti daytoy, inpakaammo ti gobernador a nakikoordinar ti Provincial Government of Ilocos Norte iti Department of Education tapno maipasyar dagiti agad-adal kadagiti nagdumaduma a lugar ditoy probinsia kas iti Laoag International Airport, Ilocandia Cultural Center wenno ICC iti siudad ti Batac, Port of Currimao, Pagudpud ken dadduma pay.
Kabayatanna, kuna ti Ilocos Norte Tourism Office nga adda ti maipaay a pagluganan dagiti agad-adal ken adda pay ti maited a pangngaldaw dagitoy bayat ti panagpasiarda.
Naammoan a nabingbingay ti grupo dagiti agad-adal iti Department of Education Division of Ilocos Norte, Department of Education Division of Laoag City ken ti Department of Education Division of the City of Batac.
Inpettengna a dagiti agad-adal a karaman iti pasyar ket umabot 145 ken napili babaen kadagiti nadakamat a division ti Department of Education.
Innayon ti Ilocos Norte Tourism Office a maibilang kadagiti lugar a pagturungan dagiti karaman iti Set A ket ti Solsona-Apayao Viewdeck, Pinili Inabel Center, Currimao Tabacalera ken ti Ilocandia Cultural Center iti siudad ti Batac, naikeddeng met a dagiti lugar a papanan dagiti karaman iti Set B ket ti Ferdinand Edralin Marcos Stadium, Inspire Building, Laoag International Airport, Capitol Annex ken ti Dap-ayan Building, dagiti met karaman iti Set C ket ti Malacañang of the North, Paoay Church, Batac Museum, Batac Riverside, Currimao Solar Farm, Juan Luna Shrine ken ti La Virgen Milagrosa Chapel idinto a ti Set D ket iti Bacarra Church and Museum, Burgos Lighthouse, Kapurpurawan Rock Formation ken ti Bangui Windmills.
