LAOAG CITY – Inbatad ti Malakanyang a saan a mapagsasaritaan no masukatan iti puwesto ni Tourism Secretary Christina Frasco iti baet dagiti pammabalaw kenkuana.
Daytoy ket kalpasan a nasaludsud ken ni Presidential Communications Office (PCO) Undersecretary ken Palace Press Officer Claire Castro no ni Philippine Sports Commission (PSC) chairman Patrick ‘Pato’ Gregorio ti isukat ni Presidente Ferdinand Marcos Jr., ken ni Frasco kas mangidaulo ti Department of Tourism.
Insungbat met ni Castro nga agpapan ita ket awan pay ti napagsasaritaan mainaig iti daytoy a banag.
Ni Frasco ket naakusaran nga inusar na ti government-funded tourism programs para iti maipagarop a “self-promotion” no sadinno a dinillaw pay ni Senador Raffy Tulfo iti maipagarop a panangipakita na ti bagi na imbes a dagiti destinasyon iti sumagmamano a promotional materials ti turismo.
Iti panagdengngeg iti Senate Committee on Tourism, inpakita ni Tulfo dagiti slides ti magazine ken dadduma pay a materyales no sadinno a naitampok ti ladawan ni Frasco.
Insungbat met ni Castro nga awan ti pammalubos na a iti pannakausar ti ladawan na iti magazine ken awan ti nausar a pondo ti gobierno.
Immunan nga inbatad ni Castro nga awan ti rigodon a mapasamak iti gabinete ni Presidente Marcos.
