LAOAG CITY – Inlawlawag ni Dr. Loida Valenzuela, Provincial Veterinarian ti proseso iti pannakaparti ti maysa a dingwen iti Slaughter House.
Segun kenkuana, iti uneg ti Slaughter House, adda ti maaw-awagan a dua nga inspeksion nga isaysayangkat dagiti trained inspectors iti kada Local Government Unit nga adda ti Slaughter House-na.
Inbatadna a ti umuna ket ti antemortem inspection wenno ti panagkita kadagiti taraken nga awan ti physical a rangkapda, physical deformities wenno aniaman a senyales a masakit dagiti dingwen ket nasken a saan a mabalin a maparti.
Inlawlawagna a ti antemortem inspection ket maiwayat ti innem nga oras sakbay a maparti ti maysa nga ayup.
Kunana nga iti post-mortem inspection ket ti manarimaan a maparparti ti maysa a dingwen.
Mainaig iti daytoy, kuna ni Dr. Valenzuela nga adda ti makunkuna a “rest period” wenno aginana ti maysa a dingwen a maiserrek iti Slaughter House iti uneg ti innem nga oras tapno napinpintas met laeng ti karne daytoy.
Inpaganetgetna a responsibilidad ti agpasken nga ikabil dagiti dingwen a maparti iti Slaughter House.
Inpettengna a masapul a maikabil dagiti karne iti freezer kalpasan ti innem nga oras a naparti dagitoy.
Kabayatanna, inpakaammo ti Provincial Veterinarian a maibiahe ita nga aldaw ti maysa a kalding a maipagarup nga adda ti rabies-na no sadinno a nakikoordinaren para iti pannakaipadalan ti laboratory test daytoy.
Maipalagip nga inaprobaran ti Sangguniang Panlungsod ti maysa nga ordinansa a mangipawil iti backyard slaughter wenno panagparti iti ruar ti slaughter house ditoy siudad ti Laoag.
Immuna iti daytoy, inpetteng ni Konsehal Jason Perera a masapul nga adda ti exemption-na ti ordinansa no sadinno nga adda ti karbengan dagiti residente a mangparti kadagiti dingwenda basta saan a paglako wenno para iti negosio.
