LAOAG CITY – Agtalek ni Senator Panfilo Ping Lacson a magun-od na ti suporta dagiti kakadwa na iti senado mainaig iti report na a mangbukitkit iti binilyon a pisos a pondo para iti flood control projects.
Iti maysa nga statement, inpetteng ni Lacson a solid dagiti ebidensya ken datos a mangipakpakita nga adda iti iregularidad iti implementasyon kadagiti nasao a proyekto ti Department of Public Works and Highways (DPWH).
Segun iti agpanpanday linteg, saan a mailibak ti disconnect ti nagbaetan ti dakkel nga alokasyon ti pondo ken iti kaawan ti nalawag a comprehensive master plan tapno solbaren ti panaglayos.
Mangnamnama ni Lacson nga iti babaen ti nasao a report, maikorehir ti sistema ti panangilatang ti pondo ken maisardeng ti pannakasayang ti pagkabanan ti umili.
Manamnama a maisaang ti report iti plenaryo kadagiti sumarsaruno nga aldaw tapno pormal a pagdedebatean ken matratar daytoy iti senado.
