LAOAG CITY – Nakalasat ti 50 a pasahero ken lima a crew kalpasan a nagsuek ti eroplano iti kabaybayan ti Somalia.
Basar iti inisyal nga imbestigasion, naaddaan ti technical problem ti Starsky Aviation a maysa a Fokker 50 plane, sumagmamano a minuto kalpasan ti panag-take off iti Mogadishu International Airport.
Inbatad ti Civil Aviation Authority (CAA) ti Somalia a nagkiddaw ti piloto nga agsubli gapu iti problema ngem napaay a makasardeng iti runway ken nag-overshoot iti Tarmac sakbay a naan-anay a nagsuek iti narabaw a paset ti baybay.
Natalged a nakaruar iti eroplano dagiti pasahero kalpasan a nagsuek iti Indian Ocean.
Dinayawda ti alisto ken kalmado a panagdesision ti piloto tapno masigurado ti kinatalged ti amin.
Agtultuloy ti iwaywayat nga imbestigasion dagiti otoridad mainaig iti nasao nga insidente.
