LAOAG CITY – Sinerrek ken sinukimat ti tracker team ti National Bureau of Investigation (NBI) Organized and Transnational Crime Division ti dua a pagtaengan iti maysa nga exclusive subdivision a maipagarup a nakarehistro iti anak ti pugante a ni Charlie “Atong” Ang.
Immuna a napanan dagiti otoridad ti maysa a pagtaengan no sadinno a sinabat isuda dagiti caretaker a mangibagbaga a kukua daytoy ti anak a lalaki ni Ang.
Naguray dagitoy agingga a simmangpet ti abugado sakbay a naan-anay a napalubosan nga agsukimat.
Nagusar ti drone iti operasion tapno masigurado a mamonmonitor ti garaw nangruna iti likud a paset ti pagtaengan.
Simmaruno a napanan dagiti otoridad ti maysa pay a property nga adda ti tallo a pagtaegan.
Naminsan a nausar manen ti drone iti ngato ti mansion kabayatan nga agsuksukimat dagiti otoridad ngem napaay dagitoy a makita ni Ang.
Inbatad ni National Bureau of Investigation spokesperson Head Agent Palmer Mallari a saan nga agsardeng ti ahensia iti panangipaay ti pateg kadagiti maaw-awatda nga impormasion iti hotline-da.
Mamati ni Mallari a ti panagdoble iti gunguna wenno P20 milyon para iti makaipaay ti impormasion tapno maarestar ni Ang ket makatulong tapno mabirukan ken matiliw ti negosiante.
Nagballaag ti National Bureau of Investigation kadagiti tumultulong iti panaglemlemmeng ni Ang gapu ta sumangoda kadagiti kaso nga obstruction of justice ken harboring a fugitive.
