LAOAG CITY – Konsultaren ti Land Transportation Franchising and Regulatory Board (LTFRB) ti publiko para iti kiddaw a nayun a plete mangrugi intono umay a lawas.
Daytoy ket gapu iti agsasaruno a lawas a panagngato ti presyo dagiti produkto a petrolyo.
Basar iti ahensiya, ti agtultuloy a panagngato ti presyo ti langis ken balor ti maintenance ti lugan ti nangiduron kadagiti grupo ti transportasyon nga agpila ti petisyon para iti umento iti minimum fare hike.
Iti maysa nga statement, inbatad ni LTFRB chairperson Atty. Vigor Mendoza III a mangiyuswat da ti dua a panagdengngeg iti sumaruno a lawas tapno trataren dagiti amin nga isyu a mangbalbalkot kadagiti kiddaw a fare hike.
Immuna iti daytoy, basar kadagiti petisyon, kidkiddawen ti transport groups ti nayun a P2 iti minimum fare, no sadinno a mapagbalin a P15 ti minimum fare para iti traditional jeepneys ken P15 agingga iti P17 para kadagiti modern jeep.
Kalikagom pay dagiti petitioners a manayunan ti kada kilometro kalpasan ti 4-kilometer charge iti minimum fare.
