LAOAG CITY – Inawagan ni National Union of People’s Lawyers (NUPL) President Efraim Cortez kas kinatakrot ti saan nga isasango ni dati a Presidente Rodrigo Duterte iti confirmation of charges hearing a naikeddeng intono Pebrero 23 ita a tawen.
Immuna iti daytoy, nagsurat ti dati a presidente iti International Criminal Court (ICC), no sadinno a nailanad ditoy a maipagarop a saanna a kayat ti agatendar iti maysa a legal proceedings a malipatan na metlaeng iti uneg ti sumagmamano a minutos, kagiddan ti panangipetteng na a naawat nan ti kinapudno a matay iti uneg ti pagbaludan.
Segun ken ni Atty. Cortez, saan a maibilang nga ‘act of defiance’ ti saan a panagatendar ti dati a presidente no di ket maysa a kinatakrot.
Sinublianan pay ti beterano nga abogado ti pannakaarestar ni Duterte agingga a naan-anay a naikabil idiay The Hague.
Kuna na a ti nasao a pasamak ket nangipakita ti pudno a kababalin ti dati a presidente no sadinno a ti rimuar a Rodrigo Duterte nga inpresentar ti International Criminal Court idi Marso 2025 ket maysa nga ‘scared old man’, saan a kas ti naimatangan dagiti Pilipino idi daytoy ti presidente ti Pilipinas.
Iti agdama ket adda met ti oportunidad a mangngegan ti amin ti alegasyon kontra kenkuana ken personal a komprontaren dagiti mangak-akusar kenkuana ngem isu met ti panagbalin a duwag ti dati a presidente.
Inpetteng ni Cortez a saan a kabaelan a komprontaren ti dati a presidente dagiti mangak-akusar nga awan ti bodyguard a nakapalawlaw kenkuana.
Ti National Union of People’s Lawyers ket maysa kadagiti grupo a tumultulong kadagiti biktima ti drug war, iti panangbirbiruk da ti hustisiya kalpasan ti nadara a kampania ti napalabas nga administrasyon.
Sumagmamano kadagitoy ket agbiyahe nga agturong idiay The Hague para iti pannakadengngeg ti kaso ti dati a Presidente ti Pilipinas.
