LAOAG CITY – Inrakurak ti Malakanyang a nagsapatan ni Atty. Melvin Matibag kas baro a direktor ti National Bureau of Investigation (NBI).
Sukatan ni Matibag ni Atty. Angelito Magno, a nagserbi kas acting NBI chief kalpasan a nagikkat iti pwesto ni NBI director Jaime Santiago iti napalabas a tawen.
Iti press briefing, inbatad ni Palace Press Officer Usec. Claire Castro nga awan ti maipaay na a detalye no apay a naaddaan ti panagbalbaliw iti liderato ken no kaano ti eksakto a panagtakem ni Matibag.
Segun ken ni Castro, nakita ni Presidente Ferdinand Marcos Jr. a mapagtalkan ni Matibag ken kabaelan na ti agserbi iti gobierno.
Ni Matibag ket nagserbi kas Cabinet secretary ni dati a Presidente Rodrigo Duterte ken nagbalin a secretary-general ti Partido Demokratiko Pilipino–Lakas ng Bayan (PDP-Laban).
Nagikkat daytoy iti partido idi Oktubre 2023.
Nagbalin pay a general manager ti Manila International Airport Authority ken presidente ken chief executive officer ti National Transmission Corporation.
Kabayatanna, naglikudan ti Malakanyang ti agwarwaras a damag a masukatan ni Ariel Nepomuceno kas commissioner ti Bureau of Customs.
Nagsapata ni Nepomuceno kas Customs chief idi Hunyo 30, 2025.
