LAOAG CITY – Naan-anayen a pinatgan ti International Criminal Court (ICC) Pre-Trial Chamber I ti kiddaw ni dati a Presidente Rodrigo Duterte a saan nga agatendar iti naikeddeng a confirmation of charges hearing mainaig iti war on drugs ti administrasyon na.
Iti dokumento a napetsaan ti Pebrero 20, 2026, inbatad ti chamber a maituloy latta ti confirmation of charges hearing uray saan nga agatendar ni Duterte.
Kagiddan iti daytoy, inbilin ti Chamber iti kampo ni Duterte, ti International Criminal Court Prosecutors, ken ti common legal representative dagiti biktima nga establisaren no ania kadagiti inpila da ti mabalin a maipublikar wenno masapol nga agtalinaed a redacted.
Ti confirmation of charges hearing ket naikeddeng intono Pebrero 23, 24, 26, ken 27, 2026 iti The Hague, Netherlands.
Maipalagip nga iti laeng nasapsapa a paset ita a lawas ket nangiparuk-at ti statement ni dati a Presidente Duterte no sadinno nga in-waive na ti karbengan na a saan nga agatendar iti panagdengngeg gapu iti tawen, salun-at ken gapu ta saanna a bigbigbigen ti hurisdiksiyon ti International Criminal Court.
