LAOAG CITY – Inpeksa ni Mr. Robert Quitog, ti Barangay 35, Gabu Sur ditoy siudad ti Laoag ti sakit ti nakemna kalpasan a maipagarup a pinapatay ti maysa a barangay tanod a ni Rolly Piedad ti tarakenna nga aso.
Segun kenkuana, idi Pebrero 14 iti oras ti alas singko ti bigat ket pinaruk-atanna ti asona tapno mapan umisbo.
Nupay kasta, kalpasan ti sumagmamano nga oras ket masdaaw daytoy no apay a saan pay a nagawid wenno nagsubli ti tarakenna nga aso.
Inlawlawagna a biniruk pay ti asawana ti aso kenkuana tapno digusenna koma daytoy.
Inbatadna a kabayatan ti panangbirbirukda ti tarakenna ket adda ti timmawag kenkuana a nangipakaammo a pinang-or ti maysa a barangay tanod ti asona agingga a natay.
Inpettengna a saan nga agkwerong ti tarakenna nga aso gapu ta nasingpet daytoy nga agbanbantay iti pagtaenganda.
Innayonna a nakapagsaritada metten iti nasao a barangay tanod no sadinno a dimmawat ti pammakawan kenkuana ken nagbayad ti maysa a ribu a pisos kas pannusa iti inaramidna.
Mainaig iti daytoy, inpakaammo ti barangay tanod a ni Mr. Rolly Piedad nga idi immasideg kenkuana ti aso ni Quitog a maipagarup nga aglablabutab ti ngiwatna ket binakalna daytoy ngem gapu ta kamatenna latta isuna ket nakapidot ti kayo nga isu ti inusarna a pinangpang-or ti nasao nga aso.
Inbatadna a basar kadagiti ubbing nga immuna a nakakita ti aso ket rumrummuar a daytoy a taraken ni Quitog ket isu ti maitudtudo a nangpapatay kadagiti sumagmamano a manok ken pato iti barangayda.
Inpaganetgetna a saanna nga inranta a pang-oren ti aso no diket ilayatna laeng koma ti kayo ngem gapu ta umas-asideg latta daytoy kenkuana ket napang-orna kas proteksion ti bagina.
Kabayatanna, nagpalagip ni Barangay Kagawad Rexon Sobrevega kadagiti adda ti tarakenna nga aso iti barangayda nga agbalin a responsable dagitoy.
