LAOAG CITY – Natagbat ti rupa ken abaga ti maysa a mannalon iti Barangay San Julian iti ili ti Solsona.
Ti biktima ket agtawen ti 38 ken naasawaan idinto a dagiti maitudtudo a suspek ket ti agama nga agtawen ti 68, naasawaan ken ti anakna nga adda iti umno a tawen, mannalon ken agpapada dagitoy a residente ti Barangay San Julian iti ili ti Solsona.
Segun ken ni P/Cpt. Randy Damo, Hepe ti Solsona Municipal Police Station, basar iti inisyal nga imbestigasionda, napan ti biktima iti kataltalonanna tapno agpadanum ti mulana a mais babaen ti irrigation water system.
Inbatadna a timmalaw ti biktima ken nagsubli kalpasan ti sumagmamano nga oras iti kataltalonanna no sadinno a naduktalanna a ti water irrigation nga agturong iti mulana ket sabalin ti nagturonganna.
Gapu iti daytoy, kinomprontar ti agama ken ti dua a lallaki a kaduada ti biktima maipanggep iti panagusar ti irrigation system iti mulana.
Mainaig iti daytoy, napan nangala ti buneng ti ama a suspek ken kellaat a tinagbatna ti rupa ti biktima idinto a tinagbat pay ti anak a suspek iti akin-kannigid nga abaga ti biktima.
Kunana a saan met a nabartek dagiti suspek idi napasamak ti insidente ken awan ti rumrummuar a dati a susik dagitoy.
Innayonna a saan a narekobre dagiti otoridad ti buneng a mapapati a nausar iti panagtagbat dagiti suspek iti biktima.
Naammoan nga insigida a timmaray ti biktima tapno agkiddaw ti tulong iti pagtaenganda no sadinno a naitaray ti biktima iti Gov. Roque B. Ablan Sr. Memorial Hospital para iti pannakaagasna ngem naiyakar iti Mariano Marcos Memorial Hospital and Medical Center iti siudad ti Batac para iti naan-anay a pannakatamingna.
Kabayatanna, nagtalinaed ti natataengan a suspek iti Solsona Municipal Police Station para iti umiso a disposion.
