LAOAG CITY – Naikkaten iti agarup amin a komite iti Senado ni Senador Ronald “Bato” dela Rosa gapu iti naunday a panawen a saan a sumsumrek daytoy.
Inbatad ni Senate President Tito Sotto nga adda ti maelektaran kas kasukat iti amin a dadduma pay a komite a miembro ni Dela Rosa.
Inlawlawagna a sursurotenda laeng ti rule 11 section 23 ti Senado no sadinno a no nabayagen a saan a sumsumrek ti maysa nga agpanpanday linteg wenno lima a daras a saan a nagatendar iti committee hearings nga awan ti palawag ket mabalin daytoy a maikkat iti committee membership.
Kunana a no saan met a mangisaysayangkat ti taripnong wenno panagdengngeg ti maysa a komite ket mabalin nga agtalinaed a miembro pay laeng ni Dela Rosa.
Karaman kadagiti komite nga inikkat ken sinukatan ni Dela Rosa ita a bulan ti Blue Ribbon Committee ken Ethics and Privileges.
Maipalagip nga idi pay Nobiembre ket saanen a nagpakita ken simrek iti kangatoan a pagpandayan linteg ni Sen. Bato kalpasan a naipadamag nga addaan daytoy ti arrest warrant manipud iti International Criminal Court (ICC).
