LAOAG CITY – Nakiraman metten ti kaalyado ti Iran a militante a grupo nga Hezbollah nga adda idiay Lebanon iti gubat kontra iti Israel ken Amerika.
Daytoy ket tapno agibales iti pannakatay ni Iran Supreme Leader Ayatollah Khamenei.
Kinumpirmaran ti Hezbollah a nangiwayat daytoy ti missiles ken drone strikes iti Israeli army base iti abagatan ti Haifa.
Daytoy ti umuna a rocket a pinaruk-atan ti Hezbollah a nangburak iti ceasefire a nagtinnulaganda ti Israel idi Nobiembre 2024.
Iti maysa nga statement, kinumpirmaran ti Hezbollah a na-target-da ti Mishmar HaCarmel missile-defense site iti tengat rabii ti Lunes, Marso 2.
Nupay kasta, basar iti Israeli military, nalappedanda ti projectile manipud idiay Lebanon ken nagsuek iti open areas.
Inawagan ni Lebanon Prime Minister Nawat Salam ti panangiwayat ti rockets manipud iti southern Lebanon kas iresponsable ken mapagat-atapan nga aramid.
Inpetteng ti Prime Minister a saanda a palabsen nga adda manen ti mapasamak a riribuk iti pagilianda ken aramidenda ti amin ti maiyannatop nga addang tapno mapasardeng dagiti responsable iti panangatake ken protektaran dagiti umili ti Lebanon.
