LAOAG CITY – Kalikagum ti sumagmamano a jeepney drivers ti Laoag-Gabu Central Terminal a maikkat ti excise tax kadagiti produkto a petrolyo iti baet ti big-time oil price hike.
Segun ken ni Mr. Jonathan Salvador, Vice President ti Laoag-Gabu Central Terminal, dakkel a padagsen kadakuada a driver ti panagbayad ti excise tax gapu ta imbes a nayon iti gastosenda iti inaldaw-aldaw a panagbiag ket maikabil laeng daytoy iti excise tax.
Inbatadna nga ad-adda pay a marigatanda kadagitoy a gundaway gapu iti panagngato ti presio dagiti produkto a petrolyo gapu iti kumarkaro a gubat idiay Middle East.
Inlawlawagna a no agtultuloy ti panagngina ti presio ti gasolina ket posible a mapilitan dagiti dadduma a driver kangrunaanna kadagiti agba-boundary wenno dagiti makipaspasada laeng nga agsardeng nga agpasada.
Kunana a makakonsumo ti luganda a jeepney ti tallo a litro iti maysa a round trip.
Mainaig iti daytoy, inpakaammo ni Salvador nga adda ti manamnama a panangtratar ti Sangguniang Panlalawigan mainaig iti temporario a pannakaipangato ti plete kadagiti jeepney.
Innayonna nga umabot iti 500 agingga iti maysa a ribu a pisos ti mapasadaanda iti uneg ti maysa nga aldaw ngem arig kagudua iti daytoy ket mapan laeng iti panagpakargada ti gasolina.
Immuna iti daytoy, naiget ti pannakikoordinar ti Senado ken ti Kamara de Representantes iti Malacañang mainaig iti pannakasuspenso ti excise tax kadagiti produkto a petrolyo iti baet ti mapaspasamak a krisis idiay Middle East.
