LAOAG CITY – Nagpanawagan ni Sen. Risa Hontiveros a mangipasa ti gobierno ti P52.8-bilyon nga emergency supplemental budget tapno maalay-ayan ti epekto ti kumarkaro a gubat iti Middle East iti ekonomia ti pagilian.
Inaramid ni Hontiveros ti panawagan kabayatan a ngumatngato ti presio ti diesel ken petroleum iti pagilian ken nangrugin a marikna dagiti motorista ti epekto ti rinnupak iti Middle East.
Iti gakat, mailatang ti P12 bilyon para iti transport subsidies, P2.9 bilyon para iti agricultural subsidies ken saan a bumaba iti P38 bilyon para iti repatriation ken reintegration ti overseas Filipino workers (OFWs).
Inbatad ni Hontiveros, mabalin nga umabot iti P12 bilyon ti nayon a gastos iti krudo no ngumato ti sumurok P10 iti kada litro ti presio ti langis iti uneg ti tallo a bulan.
