LAOAG CITY – Inpakaammo ni Mr. Greg Mendez, maysa a tricycle driver a makipaspasada laeng ditoy siudad ti Laoag nga arig awanen ti maiyawidna iti pamiliana gapu iti kinangina ti gasolina.
Segun kenkuana, narigat ti agdama a situasion dagiti tricycle drivers nangruna kadagiti padana a makipaspasada laeng gapu ta imbes a nayon iti panggastos iti pamiliana ti mapasadaanna ket maikabil laeng iti panagpakargana ti gasolina.
Inbatadna a gapu ta agba-boundary ket kasapulanna a makabirok ti 250 a pisos iti kada aldaw isut gapuna nga arig awanen ti mabati ti mapasadaanna iti uneg ti maysa nga aldaw.
Inlawlawagna a saan met a kanayon a napigsa ti panagpasadana ken ad-adda pay a rimmigat kadagitoy a gundaway gapu iti agsasaruno a panagngato ti presio dagiti produkto a petrolyo.
Kabayatanna, kuna ni Mendez a nasaysayaat a fuel subsidy ti maipaay kadakuada a tulong manipud iti gobierno imbes a maipangato ti plete gapu ta mariknana a marigatan dagiti pasahero kangrunaanna kadagiti estudiante.
