LAOAG CITY – Inbilin ti Philippine National Police (PNP) ti amin nga unit na a paigetan ti pannakaipatungpal ti road safety measures tapno maliklikan ti aksidente ita a Semana Santa ken summer break.
Segun ken ni Philippine National Police spokesperson Brig. Gen. Randulf Tuaño, mangideploy da ti umdas a bilang dagiti pulis para iti naiget a pannakaipatungpal ti linteg trapiko, karaman ti panaginspeksyon kadagiti pampasahero a behikulo kadagiti terminal.
Kuna na a napateg pay ti naan-anay a koordinasyon kadagiti lokal a gobierno ken dadduma nga ahensya.
Basar iti datos ti Philippine National Police, bimmaba ti pakabuklan a bilang ti aksidente iti kalsada idi Abril agingga iti Mayo 2025 iti 30,516 manipod iti 31,992 idi 2024, ngem ngimmato ti bilang dagiti natay idi 919 manipod iti 884.
Kaadoan ti kaso iti Central Luzon, Calabarzon, Ilocos Region, ken Northern Mindanao.
Mainaig iti daytoy, ginutigot ti nailian a pulisya dagiti motorista a siguradwen a naurnus ti lugan ken planwen a naimbag ti panagbiyahe.
Kabayatanna, nagballaag met ti Philippine National Police iti panagngato ti kaso a pannakalmes gapu ta idi 2025 ket nakairekord ti 151 nga insidente no sadinno a kaadoan ket iti Ilocos Region ken Calabarzon.
Nagpalagip ti Philippine National Police iti publiko nga agbalin a responsable ken sumurot iti safety measures kabayatan ti panagbakasyon.
