LAOAG CITY – Inlawlawag ni P/Cpt. Tolentino Erum, Hepe ti Bacarra Municipal Police Station a saanna a dinangran ti maitudtudo a lider iti panagtatakaw iti maysa a pagtaengan ti Barangay 3, San Andres II iti ili ti Bacarra.
Inpettengna a mamati isuna a naaramid ti indibidual daytoy a pammabasol kenkuana gapu ta nadakamatna a pilaandanto daytoy ti kaso apaman a makabirukda ti naan-anay nga ebidensia kontra iti daytoy.
Inbatadna a saan met a pammerperdi iti maitudtudo a lider iti panagtatakaw ngem basar iti imbestigasionda ket addan ti rekord daytoy iti kallabes pakairamanan ti guardian-na.
Nupay kasta, saanen nga inbuksilan pay ni P/Cpt. Erum no ania ti nakairamramanan ti nasao nga indibidual.
Maipalagip a basar iti Bacarra Municipal Police Station, agarup alas otso ti bigat, nakita ti biktima dagiti suspek a simrek iti pagtaenganna babaen ti panangdadaelda iti fixed glass window.
Gapu iti daytoy, insigida a nagkiddaw ti tulong ti biktima kadagiti barangay officials no sadinno a nakitada dagiti suspek nga adda iti uneg ti pagtaengan ti biktima nga insigida met a tiniliwda dagitoy.
Mainaig iti daytoy, dagiti suspek ket agtawen ti 20, awanan asawa ken residente ti Barangay 28, Cabusligan iti ili ti Bacarra ken maysa a lalaki a menor de edad a residente ti Barangay Pulangi iti ili ti Bacarra.
Naammoan a dagiti natakaw ket 1 a male wristwatch, Seiko 5 nga agbalor ti P17,000.00, 1 a backpack nga agmaris ti blue ken nangisit a naglaon ti 3 a pedaso ti nangisit a medyas, 1 a bassit a bag, 1 a male wallet ken 2 a female wallets.
Iti agdama, nakabaluden ti suspek nga agtawen ti 20 iti Ilocos Norte Provincial Jail idinto a ti menor de edad ket naiyendorso iti Municipal Social Welfare Development Office iti ili ti Bacarra.
