LAOAG CITY – Pinalubosan ti Iran ti Pilipinas a libre a makadalyasat iti Strait of Hormuz dagiti barko nga adda ti kargana a produkto a langis.
Daytoy ti inanunsio ti Department of Foreign Affairs (DFA) kalpasan ti pannakisarsarita iti telepono iti nagbaetan da Department of Foreign Affairs Secretary Ma. Theresa Lazaro ken Iranian Foreign Minister Seyed Abbas Araghchi.
Inbatad ni Lazaro, nagbalin a “very productive” ti phone conversation-da idi Abril 2 ken ni Araghchi no sadinno a natalantan ti panangpapigsa ti koneksion ti dua a pagilian.
Kunana a napateg ti “positive” a development daytoy para iti Pilipinas gapu ta maipasigurado ti kinatalged dagiti Pinoy seafarers iti Middle East ken ti agtultuloy a suplay ti enerhia iti pagilian.
Inlawlawag met ni Department of Foreign Affairs spokesperson Analyn Ratonel nga awan ti singiren a toll fee ti Iran iti Pilipinas.
Kabayatanna, ti panagsinnarita ti dua a pagilian ket gapu iti pammilin ni Presidente Ferdinand Marcos Jr. iti Department of Foreign Affairs a makikoordinar iti Iran tapno makadalyasat ti barko iti Strait of Hormuz gubuay iti tension iti Middle East a makaap-apektar iti presio ti langis iti world market.
