LAOAG CITY – Inpasigurado ti Department of Health (DOH) nga umdas pay laeng ti suplay ti agas iti pagilian kabayatan nga agtultuloy ti panagmonitor ti presio dahil iti krisis iti langis gapu iti tenson iti Middle East.
Inbatad ni Health Secretary Ted Herbosa, gapu iti panagngato ti gastos iti produksion ken logistics ket posible a ngumato ti preso ti agas ken dadduma pay a produkto kadagiti sumarsaruno a panawen nangruna ket adu ti medical supply ket ang-angkaten pay manipud kadagiti dadduma a pagilian.
Iti baet daytoy, kuna ti Department of Health nga adda ti nakasagana nga stockpile ti agas para kadagiti ospital ken publiko isut gapuna nga awan pay ti nairekord a panagkurkurang.
Iti baet a manamnama a ngumato ti gastosen dagiti umili kadagiti medical prescription-da, inpasigurado ti Department of Health nga agtultuloy ti serbisio para iti salun-ta iti pagilian.
