LAOAG CITY – Inpetteng ni Pope Leo XIV a saan daytoy a maysa a pulitiko ken saanna a kalikagum a maki-debate iti asinoman pakairamanan ti administrasion ni United States President Donald Trump.
Inaramid daytoy ti Santo Papa iti panagsangona kadagiti agirakrakurak kabayatan a nakalugan iti papal plane nga agturong idiay Algeria.
Inbatadna a ti misyon daytoy ket idanon ti Gospel ken saan a makiraman iti pulitika.
Dinakamatna a nasken a saan nga abusoen ti mensahe ti Gospel ken agtultuloy daytoy nga agsarita kontra iti gubat tapno ilungalong ti kinakappia ken multilateral dialogue iti nagbaetan dagiti estado.
Daytoy a rakurak ket mangipakpakita kas panangpatibker ti panangpatalged ti Simbaan Katolika nga agtalinaed a nakasentro iti kinakappia ken hustisia nga imbes a makiraman kadagiti riri iti pulitika.
