LAOAG CITY – Posible a ni United States President Donald Trump ti maysa kadagiti target iti napasamak a pammaltog iti White House Correspondents’ Dinner basar ken ni acting United States Attorney General Todd Blanche.
Inbatad ni Blanche nga agtultuloy nga im-imbestigaran ti motibo ti suspek ngem basar iti pakpakauna nga imbestigasion, rumrummuar a target dagiti opisial ti administrasion pakairamanan ti Presidente ti Amerika.
Basar iti report, armado ti suspek ken ginandatna a labsan ti security checkpoint iti venue sakbay a nagpaputok ti paltog a nangitunda ti riribok ken alisto a panagibakwit kadagiti opisial ken bisita.
Binigbig ti United States media ti suspek a ni Cole Tomas Allen, agtawen ti 31 manipud idiay California.
Insigida a naarestar ken manamnama a mapilaan ti kaso pakairamanan ti posible a gandat a panangpapatay iti Presidente ken panangatake iti maysa a federal officer.
Maysa nga ahente ti United States Secret Service ti nasugatan iti pammaltog ngem insigida a nakaruar manipud iti ospital.
Basar iti ahensia, nakatulong ti suot daytoy a ballistic vest tapno maliklikan ti nakarkaro a pannakasagabana ti sugat.
Iti nagsina a rakurak, kuna ni Trump a mabalin nga adda ti pakainaiganna iti relihion ti insidente ken inladawanna daytoy kas “strongly anti-Christian,” nupay saan pay a kinumpirmaran dagiti imbestigador.
Immunan nga inrakurak dagiti otoridad nga agtaltalinaed a saan pay a sigurado ti motibo ti suspek kabayatan nga agtultuloy ti imbestigasion iti insidente.
