LAOAG CITY – Maus-usaren ti cold storage facility iti ili ti Sarrat a pagikabilan kadagiti produkto dagiti mannalon kabayatan a maiyur-uray ti panagngato ti presio daytoy.
Basar iti datos manipud iti Provincial Agriculture Office, ti agdama ket adda ti nakaidulin iti pasilidad a 15 a tonelada ti nalabbaga a sibuyas manipud iti Pasuquin Onion/Garlic Agricultural Cooperative, adda met ti 6 a tonelada ti puraw a sibuyas, 5 a tenolada manipud iti maysa a mannalon a taga Vintar ken maysa a tonelada manipud iti maysa a mannalon iti siudad ti Batac.
Gutgutigoten ni Engr. Maria Teresa Bacnat, Officer In Charge ti Provincial Agriculture Office a dagiti mannalon ti probinsia a sobra ti apitna ket mabalinda nga agidulin iti cold storage facility kabayatan a maiyur-uray a ngumato ti presio ti produkto.
Innayonna a nupay adda ti bassit a gatad a bayadanda ket masigurado ti pannakailako dagiti produkto iti napinpintas a presio ken mabalinda nga agpatulong iti Provincial Government Office ti pannakabunag dagitoy.
