LAOAG CITY – Pinatibker manen ni Britain King Charles III ti alyansa ti United Kingdom ken Estados Unidos a “more important than ever” kagiddan iti maysa a panagbitla iti United States Congress.
Inbatadna a saan a kabaelan a sangoen ti maymaysa laeng a pagilian dagiti parikot a sangsangoen ti lubong.
Inrakurak ti ari nga “highest regard and friendship” ti United Kingdom iti Estados Unidos ken sinubliananna ti naisangsangayan a panagbitla ti inana a ni Queen Elizabeth II iti kapada a panagbitla idi 1991.
Nakasentro ti panagbitla ni King Charles III iti napagtipon a British humor, pakasaritaan ken takder kadagiti sangsangoen a problema ti lubong a masansan a makaaw-awat ti nabara a sipsipat ken standing ovation manipud kadagiti agpanpanday linteg.
Iti panaglippas ti panagbitlana, kuna ni King Charles nga “America’s words carry weight and meaning,” a nangitunda ti aglalaok a reaksion manipud kadagiti audience.
Sakbay ti panagbitla, naaddaan ti panagtataripnong ti ari ken ni United States President Donald Trump iti Oval Office kagiddan ti panagsangpet ti royal couple iti White House para iti state visit-da.
Nabara a sinarabo da King Charles ken Queen Camilla iti maysa a seremonia a nakita a naginnalamano ken naginnisem dagiti opisial ti dua a pagilian.
