LAOAG CITY – Pormal nga inanunsio ni United Kingdom Foreign Minister Ed Miliband ti panangipataw dagiti dusa wenno sanctions kontra kadagiti illegal Israeli settlements iti West Bank.
Iti panagbitlana iti parliament idi kalman, Setiembre 8, inpaganetget ni Miliband a mangipatungpal ti Britain ti maysa nga import ban wenno panangipawil kadagiti produkto a sumrek manipud kadagiti nadakamat nga Israeli settlements.
Malaksid iti daytoy, mangilatag pay ti gobierno ti maysa a komprehensibo a rehimen dagiti sanction a mangipawil iti panangipaay ti tulong pinansial, serbisio iti konstraksion ken dadduma pay a suporta a komersial para kadagiti nadakamat a komunidad.
Daytoy nga addang ti United Kingdom ket naibasar iti 2024 Advisory Opinion ti International Court of Justice (ICJ) a nangdeklerar a panaglabsing iti internasional a linteg ti agtultuloy a presensia ken panangpalawa ti Israel iti West Bank.
Basar ken ni Milibank a gagem ti baro a pagalagadan ti London a protehiran ti posibilidad ti two-state solution iti tengnga ti kumarkaro a kinaranggas dagiti ekstremista wenno extremist settler kontra kadagiti Palestinian.
Kabayatanna, insigida met a nakaala ti nadagsen a tubngar manipud iti gobierno ti Israel ti nadakamat a decision kabayatan a nangipakaammo met ti pagkaalarma ti sumagmamano ng kaalyadona iti West mainaig iti posible nga epektona daytoy iti kinatibker ken diplomatiko a relasion iti rehion ti Middle East.
