LAOAG CITY – Apagapaman a bimmaba dagiti stock market iti intero a lubong gapu iti panagdanag dagiti investor iti kumarkaro a tension iti Middle East ken posible nga epekto daytoy iti presio ti langis ken ekonomia.
Ngimmato daytoy ti sumurok 5% ti presio ti langis kalpasan a rimmuar ti damag a posible nga agsagana ti Estados Unidos para iti napapaut a gubat iti Iran.
Nangitunda daytoy ti panagdanag gapu ta ti Iran ket asideg iti Strait of Hormuz, maysa a napateg a ruta a pagdaldalyasatan ti dakkel a suplay ti langis iti intero a lubong.
Naammoan a no maapektaran daytoy, mabalin a ngumato pay ti presio ti gasolina ken dadduma pay a magatgatang.
Iti United States stock market, pabaliw-baliw ti garaw dagiti index.
Bimmaba ti Dow Jones Industrial Average, agarup flat ti S&P 500 idinto nga apagapaman a ngimmato ti Nasdaq.
Agpada ti nagbalin a garaw iti European ken dadduma pay a global markets a nangipakita ti apagapaman a panagbaba.
Iti baet daytoy, agtultuloy ti geopolitical concerns, padpadaaanan dagiti investor ti resulta ti mapastrek dagiti dadakkel a technology companies kas ti namnamaen a mangipaay ti direksion iti merkado.
Malaksid iti daytoy, ngimmato met ti bond yields gapu iti manamnama nga inflation pressure manipud iti nangato a presio ti krudo idinto a pimmigsa ti United States dollar kontra iti dadduma a currency.
Kabayatanna, bimmaba met ti presio ti balitok iti maikatlo a nagsaruno nga aldaw kalpasan ti immuna a panagngatona.
