LAOAG CITY – Adda idiay France ni dati a Congressman Zaldy Co ken agkidkiddaw ti political asylum iti nasao a pagilian.
Inbatad ni Palace Press Officer Atty. Claire Castro a kumpirmado nga awanen iti kustodiar ti Czech Republic ni Co no diket adda idiay France.
Daytoy ket kalpasan nga inawat ni Presidente Ferdinand Marcos Jr. ti kumpleto a report manipud kada Justice Secretary Fredderick Vida ken Foreign Affairs Secretary Thess Lazaro.
Kuna ni Castro, nakaawat met ti highly reliable information ti Department of Foreign Affairs a ni Co ket addaan ti nakapenpen a petision para iti political asylum idiay France.
Inlawlawagna a kiniddaw pay ni Co nga iyakar isuna nga adda itan iti kustodiar dagiti otoridad idiay France.
Inpetteng ni Castro a saan a nakabalud ni Co idiay France no sadinno a winaya-wayaan isuna iti nasao a pagilian gapu ta adda ti nakapenpen a petition for political asylum.
Malaksid iti daytoy, awanen ti dadduma pay a detalye no kasano a nag-apply ti asylum iti nasao a pagilian ni Co.
Ar-aramiden ti gobierno ti amin ti diplomatiko a wagas, proseso ken channels tapno maiyawid ditoy Pilipinas ni Co ken sangoen ti kasona ditoy pagilian.
Pinaayaban ni Presidente Marcos ti ambassador ti France ken chargè d’affaires ti Czech Republic ita nga aldaw tapno pagsaritaan ti amin a wagas ken proseso nga aramiden tapno maisubli ditoy pagilian ni Co.
