LAOAG CITY – Nakaawat ti pito ribu a pisos manipud iti Department of Social Welfare and Development ti sumagmamano nga agbirbirok ti trabahona a na-hired on the spot iti naisayangkat a job fair iti SM City Laoag kagiddan iti panangselebrar ti Labor Day ita nga aldaw.
Segun ken ni Ms. Shey Pia Abaya, mangidadaulo ti Public Employment Service Office ditoy siudad ti Laoag, umabot iti 32 a local companies ken 2 nga overseas manpower agencies para kadagiti pagilian a Lithuania, Japan, Hungary, Greece, Papua New Guinea ken Saudi Arabia ti nakipaset iti nasao a job fair.
Inbatadna nga adda ti 200 ribu a pisos ti inparuk-at a tulong pinansial ti Overseas Workers Welfare Administration para kadagiti distressed Overseas Filipino Workers.
Inlawlawagna a ti kaadoan a bakante a nagaplikaran dagiti aplikante ket iti retails kas iti mall, restaurant, fast food chain, car company, financial institutions ken dadduma pay.
Kunana a nakipaset pay iti job fair ti Technical Education and Skills Development Authority kaduana ti agarup 25 a training institutions, Department of Health, Philippine National Police ken dadduma pay.
Mainaig iti daytoy, inpakaammo ni Ms. Janelyn Martin, Provincial Director ti Department of Labor and Employment nga adda ti 1,847 a naidiaya a bakante a trabaho kadagiti sumurok 200 a job seekers iti job fair.
Iti agdama, kabayatan a maisursurat daytoy a damag ket addan ti walo a na-hired on the spot iti nasao a job fair.
Kabayatanna, kuna ni Mrs. Anna Liza Capini, Provincial Coordinator ti Department of Social Welfare and Development Sustainable Livelihood Program a ti naipaay a financial assistance ket nairanta para kadagiti aplikante nga aggapu iti low income families.
Immuna iti daytoy, sinaludaran ni Mayor James Bryan Alcid dagiti amin a mangmangged a mangipapaay ti dakkel a kontribusion ken sakripisio para iti panagdur-as ti ekonomia ditoy siudad ti Laoag.
