LAOAG CITY – Inallukoy ni Quezon City Rep. Patrick Michael Vargas dagiti padana nga agpanpanday linteg iti Kamara de Representantes nga ipangpangruna ti dua a gakat a gagem a mapasayaat ti kondision dagiti health workers iti pagilian ken maliklikan ti agtultuloy a panagtalawda ditoy Pilipinas.
Inlungalong ni Vargas ti House Bill No. 3520 wenno “Government Medical Doctors Salary Upgrading Act,” a mangipangato ti basic pay dagiti government doctors manipud Salary Grade (SG) 21 ket mapagbalin a Salary Grade 23.
Kayatna a saoen, ngumato ti sueldo manipud ₱73,303 ket mapagbalin a ₱91,306, wenno nayon nga ₱18,003.
Kunana a makatulong daytoy tapno makissayan ti panagturong dagiti doktor iti ballasiw taaw.
Iti babaen ti gakat, inbilin ti Department of Health (DOH) nga agsagana ti budget iti uneg ti saan a bumaba iti lima a tawen tapno pundoan ti panagngato ti sueldo idinto ti Department of Budget and Management (DBM) met ti ag-adjust ti pundo para iti implementasion.
Kabayatanna, ilunglungalong pay ni Vargas ti House Bill No. 3398 wenno “Care for Nurses’ Welfare Act,” a mangikeddeng ti limitasion iti oras ti trabaho dagiti nurse.
Gagem daytoy nga ipawil ti panangobligar kadagiti nurse nga mgtrabaho iti nalablabes ngem 8 nga oras iti kada shift wenno sumurok 40 nga oras iti kada lawas.
