Naipasa iti maikatlo ken maudi a pannakaibasana iti Draft City Ordinance No 13SP-2026- 113 no sadino a maipaayan ti lima nga aldaw a wellness leave para kadagiti COS wenno contractual ken job order nga empleado iti lokal a gobierno ditoy siudad ti Laoag.
Segun ken Sanggunian Panlungsod Member a ni Atty. Jason Perera a nangisponsor kadaytoy nga ordinansa naduktalanna nga awan iti leave wenno awan ti karebbenganda nga agleave isut gapuna nga nangaramid iti kastoy a gakat para kadagiti maseknan.
Kinunana a daytoy ket mangipaay iti naan-anay a benepisio kadagiti job order wenno contractual nga empleado iti lokal a gobierno tapno ma-promote iti mental and ken wellbeing-da.
Inlawalwagna a kada tawen ket adda iti lima nga aldaw a panag-leave-da ken kasapulan nga usarenda gapu ta saan a mabalin nga ibagada nga usarenda para next year.
Mainaig iti daytoy, kinunana pay ni Atty. Perera nga agsueldo latta dagitoy uray nakaleave-da babaen iti panangaprobar ni Mayor James Bryan Alcid.
Innayonna nga ag-epektibo daytoy no naan-anayen a ma-aprobaran iti nasao a mayor tapno no malpas ton iti termino dagiti job order ken no ma-renew ket insigida maikabil iti kontratada.
Kabayatanna daytoy a gakat ket sansangkamaysa nga inaprobaran iti konseho ditoy siudad ti Laoag.
