LAOAG CITY – Inlawlawag ti Armed Forces of the Philippines (AFP) a paset laeng ti standard security operations da ti panangideploy kadagiti marines iti senado ken awan ti pakainaigan iti aniaman nga insidente iti kallabes.
Segun ken ni AFP spokesperson Col. Francel Margareth Padilla, dagiti tropa ket regular a nakadeploy tapno mangipaay ti perimeter security iti nagduduma nga institusyon kas paset dagiti nabayagen a maipatpatungpal a protocol.
Kuna na nga adda met dagiti nadutukan a tropa da kadagiti kangrunaan a pasdek ti gobierno kas ti Malacañang Palace ken uray iti Rizal Monument.
Inbatad na a sumagmamano a tawenen ti kastoy a maar-aramid kas paset ti obligasyon dagiti soldado para metlaeng iti seguridad.
Inrakurak daytoy ti opisyal ti AFP iti baet dagiti saludsud ken agwarwaras a damage a maikonkonektar iti deployment iti possible a panangarestar kenni Senador Ronald “Bato” dela Rosa nga adda met ti pakainaigan ti kaso na iti International Criminal Court (ICC).
Inpetteng ti AFP a ti papel dagiti Marines ket para laeng iti perimeter security, isut gapuna a saanda a sumsumrek iti pasdek ti senado wenno ti Palasyo.
