LAOAG CITY – Natay ti maysa a Chinese National iti uneg ti pagtaenganna iti Barangay Aguado, Trece Martires City.
Segun iti report, nabigbig ti biktima a ni alyas Zang, Chinese national nga agnanaed iti Blk 7 Lot 15 Phase 2B, iti nasao a barangay.
Basar iti report, alas-7:45 ti bigat idi riingen kuma ti live-in partner-na tapno mangan sakbay a mapan ti trabahona ket ditoy a nadiskobrena ti awan biagna a kadwana.
Insigida met a nagkiddaw daytoy ti tulong iti barangay tanod iti lugarda.
Iti imbestigasion, awan ti nakita a senyales ti riri iti uneg ti pagtaengan ken adda ditoy ti personal a ramit ti biktima.
Idi kitaenda ti bangkay iti funeral home, awan ti nakita nga aniaman a sugat wenno senyales ti kinaranggas iti bagi ti biktima.
Rimuar pay iti imbestigasion a masansan nga umino ti arak ti biktima sakbay a napasamak ti insidente.
Nupay kasta, dumalan iti autopsy ti bangkay tapno maamoan ti umno a rason ti ipapatayna.
Kabayatanna, mannariamaan ti pannakikooperar dagiti pulis iti Chinese Embassy tapno ipakaammo iti pamilia ti biktima ti ipupusayna.
