LAOAG CITY – Kiniddaw ti legal team ni dati a Presidente Rodrigo Duterte iti International Criminal Court (ICC) nga itantan ti panangrugi ti trial proceedings ti agingga 19 a bulan.
Daytoy ket kalpasan ti confirmation of charges ti dati a Presidente idi Abril 23.
Basar iti filing ti baro a lead counsel ni Duterte a ni Peter Haynes iti International Criminal Court Trial Chamber III, kasapulanda ti nayon a panawen tapno makasagana iti kaso.
Inladawan ti abugado dagiti dati a kaso ti International Criminal Court a rinugian kalpasan ti 14 agingga iti 19 a bulan kalpasan ti confirmation of charges.
No bilang mapatgan daytoy, maiyakar ti trial iti nagbaetan ti Hunio ken Nobiembre 2027.
Maisupadi daytoy iti kiddaw ti prosekusion a rugian ti trial inton Nobiembre 30 wenno awan pay ti walo a bulan kalpasan ti confirmation of charges.
Inpetteng ti depensa nga “inappropriate” nga ikeddeng ti petsa ita gapu kadagiti saan pay a naresolbar nga isyu a mabalin a makaapektar iti panangusig.
Inbatad ni Haynes a nasken a duktalen nga umuna ti Trial chamber no “fit” a sumango iti trial ni Duterte.
Nupay bigbigbigen ti depensa ti inwayat a panangtingiting iti salun-at ti dati a Presidente idi pre-trial phase, agtultuloy ti panag-deteriorate ti kasasaadna ken masapul a makonsultar a naimbag sakbay a rugian ti aniaman a trial.
