LAOAG CITY – Nagtalinaed a kangrunaan a rason iti pannakatay ditoy Pilipinas idi 2025 ti ischemic heart diseases basar iti inparuk-at a provisional report ti Philippine Statistics Authority (PSA).
Basar iti report ti Philippine Statistics Authority nga inparuk-at ita a lawas, umabot iti 111,896 ti nairekord a kaso dagiti matmatay gapu iti ischemic heart diseases manipud Enero agingga Nobiembre 2025 a katukad ti 19.7% ti pakabuklan a bilang dagiti matmatay iti pagilian.
Segun iti United States National Institutes of Health (NIH), ti ischemic heart disease ket kondision no sadinno saan nga umdas ti suplay ti dara iti puso a mangituntunda ti kinakurang ti oxygen.
Masansan daytoy a rason ti pannakaurnong ti fatty plaques iti coronary arteries a bumarbara iti pagtarayan ti dara.
Maikadua iti listaan ti neoplasms nga addaan ti 64,864 a pannakatay wenno 11.4%.
Inbatad ti National Institutes of Health a daytoy ket abnormal a panagadu ti selula nga agresresulta iti bukol wenno tumor no saan a matmatay dagiti selula iti umno nga oras.
Adda iti maikatlo a puesto ti cerebrovascular diseases nga addaan ti 55,756 a kaso wenno 9.8% ti pakabuklan a matmatay.
Kuna ti American Association of Neurological Surgeons, karaman ditoy ti stroke, stenosis iti nagduduma nga urat iti utek, aneurysm ken vascular malformations.
Inpakaammo ti Philippine Statistics Authority nga agtaltalinaed nga agpada ti top 3 causes of death maidasig idi 2024 iti kapada a panawen.
Kabayatanna, maikapat ti pneumonia nga addaan ti 38,607 a kaso (6.8%) idinto a maikalima ti diabetes mellitus nga addaan ti 34,611 a pannakatay (6.1%).
